PVTNews
Log in Register

Login to your account

Username
Password *
Remember Me

Create an account

Fields marked with an asterisk (*) are required.
Name
Username
Password *
Verify password *
Email *
Verify email *
Captcha *

Manipur Express | February 24, 2014

HEADLINES:

Cycle atuang in Bukpi apan Lamka hongzin

Lamka, Feb-23: Upa Damzanang Tawmbing(61) s/o (late) Phungkam Tawmbing of Chapellane Veng, Bukpi in Lamka ahih ding aneih ziakin Bukpi akipan Tipaimukh road km. 177 asau cycle a tai in Lamka tan hong taitung hi. Aman a gendan in saptuam tawh kisai a hihding poimawh neih ziakin Feb 19 zing dak 7.00 a hong kipan in Feb 20 nitaklam dak 3.30 Lamka hongtung hi. Hongzin sungin antun paw mahleh lamkal ah nelou a, Kaimunnuam village ah zankhat giakin Feb 20 in hong kipankhe nawn a, Tuilaphai village ah dangtak lua chi in singpi vadawn a, huai akipan tainawn in Santing village a lamtouhna a tun in gim petmah hi’n gen hi. Ccpur dist. sungah lampi sautak cycle a taitung om mengmeng lou hi’n kigen a, Zoupi hausapa Thangsiam in kum bangzah hiam paisa in Singngat apan Zoupi tan khe in paitung ngei a, Goulian of Bukpi leng Singngat apan Bukpi tan khe in paitung ngei hi. Upa Damzanang mi damthei leh taksa hat mahmah hi a, tulelin zongtah leh sekkhum huan abawlte enkol in zan-giak zel hi’n gen hi. Tuilaphai a singpi adawn chihlouh lamkal ah tui dawnlou a, nidang in cycle tawh mun gamlatak taitung ngeilou chi hi.
Upa Damzanang Tawmbing in azi Ms. Thangnian tawh tapa 2 leh tanu 4 nei a, tu(grandchildren) 15 leh tusawn(great-grandchildren) 2 melmu in a taksa hatlai mahmah chih ahi hi. Aman hibang a hongzinna pen a sihnung chianga mite’n a gen un hong taitung hi’n gen a, huailou in Suangphuh hoihtak khat a hongzinna gelhlat ahihding deih chi hi.


HEADLINES:
Governor VK Guggal in Assembly ah thugen ding
Manipur Assembly session tuni’n kipan ding
Imphal, Feb-23:Manipur Assembly term 10na a session(sitting) 7veina Feb 24, 2014(Seppatni/Monday) zinglam dak 11.00 in kipan ding a, Manipur Governor VK Duggal in session kipan ding hongkhe kawm in thugen ding hi. Ni 8 huamsung Assembly session om sung in ni 6 sung kia sitting om ding a, March 3, 2014 in session zou ding uhi. Governor in thu a genzawh in business kipan ding a, huai ah member sisate suunna hun(obituary reference) om ding a,huai khit in Business Advisory Committee(BAC) report CM in luikhe ding hi. Huainung in Finance Minister hihna len Chief Minister in House ah ‘Supplementary Demands for Grants 2013-2014’; ‘Budget Estimate 2014’ leh ‘Vote on Account 2014-15’ abanban in lui(introduce) ding a, huaite zawh in Govt bill tuamtuam leng luikhiak hiding hi.
Assermbly session ni 2na Feb 25, 2014 in business tuamtuam, Supplementary Demands for Grant 2014 genkhawmna banah Supplementary Demands for Grant 2013-2014 genkhawmna leh voting om ding hi.Huaizawh in Motion for Vote on Account 2014 genkhawmna leh voting om ding a, huainung in Manipur Appropriation Bill puaklut hiding hi.Feb 26, 2014 in dotna leh dawnna hun om ding a,huailou business dang omte genkhawm ding uhi. Huaite zawh in Committee report tuamtuam luikhiak hiding hi. Feb 27, 2014 in leng dotna leh dawnna, business dang omte genkhawmna leh Committee report luikhiakna mah omlai ding a,huaizawh in govt bill omte genkhawm in passed ding uhi.
Feb 28, 2014 in leng dotna leh dawnna, business dang omte genkhawmna, Committee report luikhiakna leh govt bill dang omte luikhiakna banah Manipur Appropriation Bill(s) genkhawmna banah passed hiding a, huailou private member business a om leh genkhawm ding uhi. March 1 & 2, 2014(Kiginni & Pathianni) in Assembly session ah sitting omlou ding a, ani tawpni ding March 3, 2014 in dotna leh dawnna, business dang oimte genkhawmna banah govt bill omte passed hiding a, huiazawh in Speaker in assembly session khak ding hi.


HEADLINES:
Northeast mipite’n thiltung ngaisiam nawnlou
Delhi ah Assam numei 1 sualluih hinawn
New Delhi, Feb-23: Kum 21 a upa Assamese student numei khat ah zan in Delhi ah pasal 2 in kisualhuan uh chihthu om hi. Mi sualtu(rapist) mi 2 te matkhiak in om pah mahle uh thiltungin India malsuahbial(Northeast) mite thangpaisak mahmah a, tu in Delhi pansan a om Northeast akipan organisation tuamtuamte’n North East mite bawlsiatna ngaisiam nawnlou uh ahihdan taklang uh chihthu om hi.
Delhi police te’n a gendan un numei student khat sualluih ahih hun zan nitaklam hi’n gen uh a, South Delhi a Mahipalpur mun ahi chi uhi.Pasasl 2te’n a sualzawh ua a taisan nung un numeinu lau mahmah kawmin innsung apan pawtkhia in kikou a, tuaphet in innkim-innkiangte’n kidelhhuan uh a, ahihziakin mi 2te taikhe man uh chih ahi hi. Himahleh Police te’n thil omdan hoihtak a a suizui nungun, thagum a mi sualtute Rahul leh Harun kichi ahihdan theikhia in zan nitak zan nungin mankhia uh chihthu om hi. Hibangkalah Delhi police officer khat in agendanin mi sualluihte’ laka tel Rahul kichi leng Assam mi mah ahi chi a, amah leh sualluih a om numeinu a kingaizawngsa ahi uh chi’n gen hi.


HOT SPOT:

Gamsung pumpi ah tuni’n IPPI/NIDs 2nd round om a, naupang kum 5 leh anuailamte tamtak zengdalna (polio) damdoi dawnsak hi uhi.


LOCAL NEWS:
Luai(swing) ah awk kha in naupang 1 si

Lamka, Feb-23: Ngaihoihkim(10) d/o Suankhanpau of Beulahlane,Central Lamka tuni sunnung dak 2.30 velin innsung a nauluai(cradle) kikoih a awk sisa in muhkhiak hi a, a innkuante gendanin nitenga akimawlna dingin nylon a kibawl nauluai akoih uh hi’n gen uhi. Apa tulelin mundang ah zinkhia a,Ngaihoihkim leh anu kia om uh a, tuni’n Sunday School kaitawp in, amah kia inn ah om a, anu Lingsiphai ah vanzuak in hawh hi. Amah naupang fel mahmah ahihman in anute’n leng duat hawmthawh uh a,tuni’n innsung ah feet 7 dinga sang nauluai a kimawl lai bawhkhial kha a awk paisuak kha hidingin gingta uhi. Dawn School a Class-V zil Ngaihoihkim a teacher-te’ unleng pakta mahmah uh a, tuni a a tuahsiatna puaknat-huai mahmah hi’n a innkuante’n gen uhi. Anu leh apa’n ta 2 nei in anau pasal pen kum 2012 in natna ziakin si khinta hi. Guta om ziakin inn kongkhak kalh gige uh a, tuni a tuahsiat hunah leng inn kongkhak kikalh in anu’ innsung alut dek leh lut theilou in tuahsia ahihdan bang vang ah enthei a, huaiphet in kap a, a innkiangte un a zak un vadelh in huchi’n innkong khensia uhi.Siluang tuni nitak zanhahpih uh a, Feb 23, 2014 in Simveng Hanmual ah kivui ding hi.


Ntl Rural Drinking Water Awareness
Lamka, Feb-23: ADC/CCpur, Dist Admn leh PHED saina in Feb 24 tan sutzop ding in Feb 20,2014 akipan National Rural Drinking Water Awareness Week 2014 zat hi a, Feb 24, 2014 zinglam dak 10:00 in Lamka Public Ground mipi kingak khawm in procession om ding hi. Public Ground apan Tipaimukh road zui in Police station kong ah Tedim road zuitou ding ugh a, IB Road a lut in , Synod Hall tan procession pai ding uhi.IB Rd a Synod Hall ah meeting om ding a, Th.Baite,EE/PHED in vaidawnna thugen ding hi. Langkhanpau Guite, Chairman ADC/CCpur; Jacintha Lazarus, IAS, DC/CCpur; L.Ibomcha Singh, SE, Rural Circle-I, PHED; Dr HL Liensang, CMO; L.Swamikanta Singh, Director CCDU/Manipur leh K.S Tawmbing,IFS, DFO/CCpur te’n thugen ding uhi. Huai zawhin Feb 21, 2014 a block tuamtuam a Essay competition nomlai a kipahmante hawmna om ding hi.


ECA 62nd Annual Assembly om

Lamka, Feb-23: Lajangphai khua ah Feb 20, 2014 akipan Evangelical Churches Assn (ECA, ECCI) 62nd Annual Assembly 2014 (62veina) om a, Upa S.Khaikholam,Chairman, EB, ECA in hongkhia a, khawmpi sung in Rev. Alan Best, President, World Evangelical Congregational Fellowship (WECF) leh Rev .David P.Saunders, Ambassador, WECF te’n Pathian thugen uhi. Huai ah kum 2014-15 sunga Budget dingin Rs 5,36,69,000 bikhiah uhi. Tuni in ordination service om a, huai ah Rev. Jangkholam, Executive Director, ECA in Pro Pastor 1, Upa 10 te ordination pia hi. ECA 62nd Annual Assembly hun ah ECA saptuam mipi tamtak tel uh a, tunitak in Upa Thoyam Haokip, Chairman, ME Dept ECA in thumna in Assembly hun khak hi.


SSC saina a exam ah mi 589 tel

Lamka, Feb-23: Staff Selection Commission (SSC) saina in tuni zinglam dak 10:00 akipan in CCpur govt college ah Multi Tasking (Non Technical) staff semding lakna din Matriculate/Class X Level Examination, 2014 om a, buaina bangmah omlou in zou uhi. Zinglam in candidate 520 omlak ah mi 365 examna ah tel uh a, sunnung hun ah candidate 380 lak ah candidate 224 tel uhi.


Guta-te’n Activa gari khat gu
Lamka, Feb-23: District Hospital a Children Ward a step nuai ah Activa gari(grey colour) No. MN-05B/3926) tuni zingsang baihtak dak 3-4 kikal velin gutate’n gumang uhi. Activa gari neitu N.Vumhau of Dorcas Veng, New Lamka hi a, a innkuante’n Dist Hospital a damlou ompih dinga hawhin a zat uh hi’n kigen hi. Dist Hospital ah Police, VDF ban ah Dist Hospital security-te om gige uh a, sunhun in leng gari parking fee la a duty omzel mahleh Hospital campus apan 2-wheeler gari hunkhop gukmang ahihtak ziakin tamtak in lamdang sakthu gen uhi.


Naupang tamtakin Polio damdoi dawn
Lamka, Feb-23: Tuni in IPPI/NIDs 2nd round om a, CCpur district ah booth 435 kihong a, OPV vials 2505 zangin naupang kum 5 leh anuailam 36133 te' zeng dalna damdoi (polio) dawnsak uhi. Tuni booth day a damdoi dawnkha loute Feb 24& 25, 2014 in a kisaipih deptt te inn a banlut in dawnsak ding uhi.


64th NTBCA Kumtawp Khawmpi

Lamka, Feb-23:Rengkai Bible Hills a Dr Garlow Memorial Chapel ah Feb 21, 2014 akipan New Testament Baptist Churches Assn (NTBCA) saptuam te’n Kumtawp Khawmpi nei uh a. Dr. Donald Shrik, Senior Pastor, Grace Baptist Church New York, USA in Pathian thugen hi. Khawmpi palaite’n NTBCA kum 2014-15 sunga sumzat dingin Rs 2,33,40,000 bikhiah uh a,kum 2014-2017 sunga Executive Secretary dingin Rev Khamkhosiam Hangnung leh Director of Missions din Rev S.Kaikhanmang telching uhi. Governing Council a kum 3 term lending in L.Nangdoupau, H. Awnzadou leh Rev. H. Kamkhanlal telching uhi. Kum 1 sung Governing Council term lending in Th.Dongpau tel uh a, kum 1 sung mah Governing Council lending in Th. Tualdouthang leh T. Thangliansiam guang uhi. Tuni zinglam kikhopna ah Pumkhokam, Chairman, Governing Council in KLP Jubilee Souvenir hong a, Rev. B. Chinlal in thumna in lan hi. Tuni nitak in Rev. H. Doumang in 64th NTBCA Kumtawp Khawmpi thumna in khak hi.


Accident ziakin liam
Lamka, Feb-23: Lalhmasuon (65) h/o Zothangmur of Sielmat, tunitaklam dak 1.00 velin Light House kiangah Bike a tuang te’n gawikha uh a, ataklam kheguh kitan in paitheilou hi. Huailou in Thongkholun (50) s/o Tiljang of Kipgen Veng(near Radio Station) anasepna ah singlom in aveilam kheguh hihkha in kitan a, amaute hospital a etkol in om uhi.


CIPET a Machine Operator di lakna ding a interview Feb. 24, 2014 zinglam dak 10:00 in PTC GHQ office, Hiangtam Lamka ah om ding chihthu kiza hi.


IMPHAL NEWS:
ST status ngetna tawh kisai

Imphal, Feb-23: Schedule Tribe Demand Committee Manipur (STDCM) te’n tuni’n Manipur Press Club ah press-te kimuhpih in Feb 24, 2014 a Assembly session om hun ah Meitei-ten Schedule Tribe status a nget utawh kisai genkhawm ding in ngen uhi. STDCM President Prof. Y. Mohendro in ST demand ziak thildang hilou in Manipur state a indigenous mite humbitna ding leh gam leitang kepbit utna ziak hidan in gen hi. Huai tawh kisai in Nov 12, 2012 in Manipur Governor Gurbachan Jagat kiangah memorandum piak hi a, aman leng ngaikhawk in Centre tun a, tuatawh kiton in Prime Minister office in Union Home Ministry tawh kikumkhawm in Ministry of Tribal Affairs kiangah May 2013 in referred uh chi’n Prof Mohendro in gen a, tu in state govt khut ah omlel, chi hi. Tuaziakin state govt in akinlam in assembly session a genkhawm in thupukna bawl din ngen uh chi’n gen hi.


AICC Observer in Imphal hongpha
Imphal, Feb-23: AICC Observer banah Secretary in Charge of Manipur Dr Vijayalakshmi Sadu in Lok Sabha election om ding ah Manipur a Congress(I) candidate ding tawh kisai a ngaihdan lakhawm ding in tuni’n Imphal hongpha a, aman Ministers, MLAs, Frontal organisation tuamtuam leh District President-te akipan ngaihdan lakhawm ding hi’n kigen hi. AICC observer in tuni mah in Congress Minister-te, MLA-te, District President khenkhat leh Congress frontal organisation tuamuam a leader khekhat kimuhpih a, Lok Sabha election ah Congress candidate dingin kua deihhuaipen ding hiam chih ngaihdan dong hi’n kigen hi, s Aman Manipur Pradesh Mahila Congress Committee President, Youth Congress President leh NSUI President leng kimuhpih a, ni tamlou Manipur ah omlai ding a, Chief Minister O Ibobi, MPCC President Gaikhangam leh leader poimawh tuamtuamte tawh thil omdan genkhawm ding uh a, aman Delhi a tunkik hun chiangin AICC ah report pelut ding hi’n kigen hi.


O. Joy in MPP akipan kitawp
Imphal, Feb-23: Manipur People’s Party(MPP) a leader poimawh banah MPP President-lui leng hi O. Joy in tuni’n MPP akipan kitawp a, Central Committee leh Primary Membership akipan leng kitawp in MPP President kiang ah a kitawpna lehkha pia hi. O. Joy banah MPP as General Secretary-lui O. Debender Singh leh MPP Youth Front a President-lui S. Ronald Meitei leng tuni’n MPP akipan kitawp uh a, amau leng MPP President khut ah kitawpna lehkha pia uh chihthu om hi.


Nursing Sister akipan kaisang
Imphal, Feb-23: Regional Institute of Medical Sciences(RIMS) a Nursing Sister sem mi 3 tuma zekin Assistant Nursing Superintendent in kaisang uhi. Amau anuai ate hi uhi.
1.Regina Romawii
2.T. Neihkim
3.Suanniang Hatzaw


Numei pawlin sit-in-protest nei
Imphal, Feb-23 : Sagolband Moirang Leirak Machin ah Feb. 21, 2014 nitak a meltheihlouhten bomb ahihpuak uh mawhpaihna in tuni’n Sagolband area sun a numei pawlte’n Imphal a Lainingthou Khamlangba Sanglen mun ah sit-in-protest nei uhi. Amau bomb puahna mun pen ritual functions neihna mun ahih ziakin kuapeuhin zahtak dingin ngen uh a, hibang a gamtangte’n tununga hih nawnlou din theisak uhi. Huai bomb puakzaksak hi’n tunitan a kipuang om nailou uhi.


NSCN(K) 1 leh PLA cadre 1 man
Imphal, Feb-23 : PRO (Defence Wing) thusuak in a gendan in Feb. 21, 2014 in A/R ten Tamenglong district sung Noney area lak operation a bawlna uah NSCN(K) cadre khat mankhia uhi. Matkhiak a om self-styled Corporal Lumpining Rongmei (22) s/o Rajen Rongmei of Tousang village hi a, amah akipan in pistol khat leh atang 5 mukhia uhi. Thudang kizadan in tuni’n Loktak Brigade a om army te’n Mayang Langjing area lak search operation a neihna uah PLA cadre Meisnam Thoiba(34) s/o Meisnam Ibungo Singh of Kameng village, Senapati district mankhia uh a, amah akipan in pistol 1 leh magazine 1 mukhia uhi. Mat a om helpawl 2te police ah pekhia uhi.


Transfer/posting
1. W. Chandrakumar,MCS, Additional Director (Education-S/Hills) as Additional Director (Education-S/Valley).
2. Ranjan Yumnam,MCS, Additional Director (Education-S/Valley) as Deputy Secretary(CAF & PD) & ex-officio Additional Director(CAF & PD).
3. Hmangte Lerte Kom,MCS, MCS, SDO/BDO, Chakpikarong as Additional Director(Education-S/Valley).


TUNI THUPI:
“Tunglam a kipan pilna bel, atungin a siangthou phot a, huaikhitin kituah a ut a, a nunnem a, a chihnuam a, hehpihna leh gahhoih in adim a, khentuam a neikei a, a lepchiah kei hi.”
–Jakolb 3:17


Nam piching i chih!
Lok Sabha leh Rajya Sabha ah Telangana statehood tawh kisai thu ‘passed’ a bawl ua leh Andhra Pradesh state a sousang mahmah chih ithei a, phetlou in, centre a vaihawmna len Congress party kal leng buai mahmah chih thu kuamna ihaih kei uhi. Huchih lai in, tulai khawvel et in eilawi adingin leng ataktak dinmun ah ettuak om lou ding hiam chih ngaihsut tham chinga, khenthamlouhte gibang kikhenkhen hun hiam kichi adikna hong kilang semsem dingin kilang semsem ding dinmun ah om ta hi.
Tulai khawvel I ngaihsut chiangin ‘maban ngaihsutna tawh I mi Nam te’ bang tuak ding” chih ahi. Manipur’ singtangmi helpawlte sehnih kisuah in Kuki National’s Organisation (KNO) leh United People’s Front (UPF) in kikhen uhi. Manipur Express in mi Nam kipumkhatna ding naktakin atangkoupih ta a, ahihziakin, ataktak hun kitung nailou eive maw chih theih ding tamtak a om hi. Saptuam level ah hon pan ua, civil society te’n anung thuap uhia chih I theikei.Nungthuap lua le himaithei, ahihziakin, eilawi iki pumkhatna ma zaw bangmah apianding a lamet huaikei! Thamlou in Manipur singtangmi Naga, Kuki leh Zomi-te khekhat a adinkhiak ma uh bangmah piangkhe ding in lamet huailou a, India malsuahbial en le hang, ULFA makaih a helpawlte khekhat a din ua, political party te’n kal asuan khawm ua, civil society te’n lou ma kibang hiven a chih ma uzaw ei adingin I mai uh mial mahmah lai atheih ahi.
Minam piching i suahna dingin minam piching lungsim leh khawhei dan i neih kul hi. Eilawi suangtu kibang, tawndan kibang, I biak kibang chihte I hah gen mahmah ta ua, phetlou in, kampau leh khaw heidan (movement) tanpha KHAT ngen ihi uhi. Sisan khat pu a, sul khat kual, tuun sung khat apan piang ngekngek ihihdan i lahphuah siamte uleh a sak siamte’n nakpitak in taklang khinta uhi. Kipumphatna daaltu kua hiam chih tanpha in zan issue ah igelh khinta a, Nam makaite’ adingin leng kingaihtuahna thamzet ahita. Bangziaka suangtu kibang UPF leh KNO te lemna thugenna hun ah dawhkal khat umkual theilou uhiam? Tua dingin, Innkuan khat leh nih, khua khat leh nih leh beh leh phung sung chiangchiang khawng chauh huap ngaihsutna i neihte i paihmanga, i beisak aloutheilou hita hi. A hun leh a mun zui a ngaihsutna piching i neih pe’n mi pichingte’ hihdan leh gamtatzia hi a, tua bang gamtat kilawm a kisam minam i hita hi. I minam milip hong kibehlap in, i nekzonna, i zinsuk zintouhna hong kidanga, i biakna zuih ut, i mimal lunglut hong kidangin, i politics muhdan zong hong kibang nawnlou a, i duh i deih hong kibang khin thei nawnloy in, innkuan khat leng i lunglut leh i hoihsak hong kidang bangin ngaihsut thei law mahmah hi. Tua ziakin 'piching lungsim' i puak theih ding hong kisam pha diak adiam chi ut dan ihi.
Thuakzawhna (tolerance), ahih kei leh theihsiamna (understanding) banah midang ngaihsutzia theihsiampihna chihte minam piching te neih sitset khantouhna nuntakzia ahi hi. Tua bang a nei theilou minam pen a piching nailou, a niam mahmah, a khangtou nailou leh a mitkeuh nailou minam ahi chi ut ihi a, mimal kivel hun ahi hi. Leader khat ihihleh bangchi bang leader ihi a, ei maban ding khual lel leader ihihkhak leh vangtahna in a hon zui ngeingei ding hi. Na dam sung in helpawl leader na hikei dinga, na damsung mah in MLA/Minister na hihet kei dinga, na damsung mah in civil society leader na hikei ding chih ngaihsun in. Tu hut a mi Nampi gawmkhawmtu na hihle bel na sulnung mi Nam ah chiamteh det ahi ding a, Laisiangthou a kigelh Mosi bang na hithei a, thamlou in leitung thil ah Mahatma Gandhi, Dr Nelson Mandela, Prabhakaran ahihkeileh mi thupi tuamtuam hihtheihna lampi tamtak a om hi. Tua ziakin a poimawh mahmah ahihleh kei chih sang in ‘Ei’ chih pen pichin huai zaw ding a, ka ngaihtuahna chih sangin, I lemgel khopna uh chi pen thupha hizaw ding hi. Democracy hilou a Autocracy I zat sung teng mi Nam khanglou lou dingin ngaihsut huai mahmah hi.


NATIONAL NEWS:
India ah vote nei mihing 814 million phata!
New Delhi, Feb-23: India gamsung a mihing omzah kibehlap nasa mahmah a, kum 1998 apan tuni tanin voter percentage kibehlap nasa mahmah in 34.45% tungtou chih hi a, tua
ziakin India gama vote nei tengteng kigawm 814.5 million tungtouta chih ahi hi. Official thusuak in a gendan danin kum 1998 in India gam pumpi ah vote nei mihing 605.8 million om a, huai naktaka kibehlap tou in tu in mihing vote nei 814 million khengtouta chi uhi.
Voter list tawh kisai a nanungpen (latest voter list) dungzui in Dadra and Nagar Haveli ah kibehlap nasapen in 53.9 % in khangtou chih hi a, huai khandan (growth) pe’n kum 2004 apan 2014 kikal et hi a, azom in Puducherry hi a, voter list 39.1 % in khangzou chih ahi hi. Tualou in, West Bengal bangleng ‘highest rate of growth’ ah maimai lou in 31.7 % tung hi’n Election Commission official thusuakin gen hi. Huchih lai in, Andaman and Nicobar Islands pe’n voter kibehlapzah niampen(lowest growth rate) a chiamteh hi a, kum 2004-2014 (kum 10) sungin voter rate khandan 6.7 % lel tung a, a zomin Jammu & Kashmir hi a,huai ah 8.9 % lel in khang chi uhi.


Nekgukna ziakin Congress kivui - Modi
Jagraon (Punjab), Feb-23: BJP's prime ministerial candidate Narendra Modi in tuni in Punjab state sunga om Jagraon mun ah thugenna nei in, Congress in nekguk-takgukna hahbawl mahmah a, Congress Minister leh MP banah state tuamtuam a a MLA te uh corruption vaiah uang law mahmahin, mi bangzahhiam jail ah atankhit nungun tu in Nekgukna tawh kisai mah in Congress party leikawm ah kivui ding hita chi hi. India mipite’n Congress te leikawm ah aphum ngeingei ua leh athohkikna ding uh haksa ta mahmah ding a, tua ziakin khangthakte’n nekguk-takgukna banah huaihamna kichite anak bawl luat ziakun mipite’n ning mahmahta a, khangthakte’n amaute nekguk-takgukna tungtawnin voiding uh hita chi’n Modi in mipi mai ah gen hi. Modi in ataklat behna ah, Congress te’n ABC lam (nomenclature) khenggawp ta ua, tu in bel A in Adarsh (scam), B in Bofors case, C in Coal scam leh adangdang genta ahi chi hi. Modi in ahihleh, tuni in Punjab a Jagraon town munah "Fateh rally' nei in tua ah mipi a sing 5 val ding paikhawm uh chih ahi.


India ah military coup omlou ding - AK Antony
Kochi, Feb-23: Union Defence Minister AK Antony in tuni a Kochi mun a agendanin, India gam ah military coup kichi himhim a omkei ding chi hi. Antony in agenna ah, kum 2 paisa 2012 kumin army unit 2 in Delhi khawpi azot tungtang uh tuni dong buaipih det in om a, tuape’n thubuaihuai suaklou himhim ding a, Indian military te’n gamdangte banglouin civilian government's thupuknate azahtak mahmah uh chi hi. Tua ziak mah in India ah sepaihte’n thagumin vaihawmna alenkei ding uh ka chi ngam chi hi. Indian defence forces tawh kisai kum 7 paisa apan ka enkha tou den a, Army, Navy, Air Force leh Coast Guard te muanhuai huntawk kasa mahmah a, chihtakna in India military te’ lakah vaihawmlel hi’n ka thei chi’n Union Defence Minister Antony in gen hi.


Assam a innkuan 1 apan mi 2 thah in om, mi 3 mang
Guwahati, Feb-23: Assam’s Cachar district sung ah zan nitakin meltheihlouh galvantawi pawlkhat in inn khat buluh in mi 2 kaplum ua, 1 kapliam in, tu in mi 3 a om na theihlouh in manglel chi uhi. Police ten agendanun, galvantawi mi 20 vel dingte’n Silchar khawpi sunga Kathalbagan area ah innkhat va luh in a pa uleh atanu ukhat kaplum ua, atapa ukhat naktaka liam in, a zi, atapa leh atanu khat a om na theihlouh in om ua, galvan tawi te’n a pimang uh hidingin muanmawhthu kigen hi. Police ten thiltung suizui ngal in galvantawite gam zon uh hi’n kigen hi.


Behali gammang ah siluang 4 muhkhiak in om
Biswanath, Feb-23: Assam state sung a om Biswanath Sub Division a Behali gammang (forest) lakah tuni in siluang 4 muhkhiakin om a, huai in huai area mipite sousangsak mahmah chih ahi. Mi 4 te ahihleh apaisa January 29, 2014 apan a om na uh theihlouh a mang ahi hi. Sihna tuak mi 4 te’ lakah Burha Teron, Bishay Teron leh Prakash Teron te bel Karbi Block, Pathaijan (Biswanath sub-division) apan ngen hi ua, adang khat pe’n Maneswar Munda kichi ahihleh Kukurmara village (Gohpur sub-division) mi ahi chi uhi. Pimang a om banah sihna tanpha tuak mi 4 te bel kum 40 apan kum 50 kikal mi ngen ahi uh chi uhi. Amaute ahihleh, a khut uh nunglam hensa in om vek a, apumpi uah leng soisakna ma muhding om a, Police leh Arunachal Agrasan Pratirodh Samiti te’n siluang te amuhkhiak uh ahi chi uhi. Ni tamlou paisa in Assam leh Arunachal Pradesh state gamgi bul ah siluang bangzahhiam muhkhiak hita a, tuni a kimukhia mi 4 te tawh sim in mi 15 bang phata ahi chi uhi.


TRS chief Rao in Sonia Gandhi kimuhpih
New Delhi, Feb-23: Andhra Pradesh a political party tallang mahmah TRS a party chief K Chandrasekhar Rao in tuni in Congress Chief Sonia Gandhi kimuhpih in thu tuamtuam houlimna nei uh chih thu kiza hi. Ni 2 paisa a thuthang kizadanin, Congress makaih UPA government in Lok Sabha leh Rajya Sabha ah Telengana state piansakna dinga ‘voice vote’ tungtawna bill passed abawl uh Telangana bial mipite’n kipahpih mahmah chih hi a, huai kawmkawmin Telangana state piankhiak theihna dia panla TRS party in Congress party belh maithei chih ahi. Ahih ziakin, tunitaka Rao in media te’ mai a agenna ah, Sonia Gandhi tawh tunitaklam a ka kimuh hun uah politics tawh kisai bangmah ka houlimkei uih chi hi.
Telangana tungtanga government in thupukna kichiantak hon bawl uh kipahthu gen a Sonia Gandhi va kimuhpih ka hizaw chi’n Rao in gen a, ahihziakin, maban thil paizel dingdan Andhra Pradesh a AICC General Secretary in-charge Digvijay Singh tawh kithuzak zeldinga zaksak a om ahihdan bel taklang hi. Zanhal in Telangana apan Congress leader hunkhop in Sonia Gandhi va kimuhpih ua, tua nung sawtlou in Congress leader banah Union Minister Sarvey Satyanarayana in TRS te’n Congress azoppah uh lamet ahi chih kampau teh chi uhi. Telangana state thak bel India khangthu adinga state 29 na ding hita hi.


NLFT cadre khat kipekhia
Agartala, Feb-23: Tripura a helpawl kumlui National Liberation Front of Tripura (NLFT) a cadre khat tuni’n Assam Rifles te’ mai ah kipekhia (surrendered) hi. Police thusuak dan in Bongsida Reang in AK 47 tang hunkhop a piaklut ban ah tax collection receipts tel in document poimawh pipi leng pelut chi uhi. Reang ahihleh, Bangladesh a NLFT camp apan aguuk a hong taikhia AR te mai a kipekhia hidanin gen uhi.
Hibangkalah, tu zingkal baihtak in NDFB (Daimary) faction te leh security force te naktak in Assam's Kokrajhar district sung ah kikaptuah ua, huai ah NDFB cadre khat in sihna tuak hi. Ranjan Daimary group te ahihleh government tawh kihou utloute pawl hi ua, tu zingkalbaihtak in Howraguri Narayanpur mun ah security force te tawh kibing phutkha in kikaptuah om chi uhi. NDFB cadre apan in AK 56 Rifle khat leh tang 5 ban ah magazine 2 mukhia uhi. Cadre dangte ahihleh khawmial nuai ah kihemmang man uhi.


Zunheboto ah nupa kop khat thah in om
Zunheboto, Feb-23: Nagaland state sunga om Zunheboto a South Point Colony ah zan nitakin vaite (non-local) nupa kop khat thah in om uhi. Police te’n agendan un, siluang 2 te ahihleh chetsem ding leh post-mortem bawldingin Zunheboto police Station ah koih in om lel uhi. Thah a om m 2 te ahihleh Azizul Hussian (27) leh a zi Hushira Begam hi’n kigen a, tem hiam mahmah zanga a lu uh leh apumpi uh mun tuamtuam pansan a satlup hiding un muanmawh huai mahmah chi uhi. Begam ahihleh gaai (pregnant) lel a, kha nawn vel a nau neiding hi zaw mah in kigen hi. Nupu kop khat sihna tawh kisai in Police te’n Azizul Hussain sanggampa thudot dingin kem lel uhi.


Mi 2 in lenna sungah Airhostess sual sawm
Kokata, Feb-23: Kolkata apan Jaipur zuandia leeng Air Deccan lenna sung ah passenger nih in Airhostess sualsawm mah le uh lawhsam ua, a khawnung in matkhiak hingal uhi. Police thusuak in ataklatdan in, Kutush Ali (25) leh Sheikh Zahir (27) in Ajmer Sharif a pathian biaksawm uh hi’n kigen a, lenna lengkhe panpan chih ding in pasal nih te’n Airhostess nu awlawl a geem in, a khesiik sak ua, tuazawh in a muuk tawpsawm uh ahi chi uhi. Passenger mi nihte’n Airhostess nu sam in dotna hai huai taktak dong ua, tua zawh in, a mineral water uh a keh ziak in bottle thak a khen ding in ngen ua, airhostess nu’n leng bottle thak va pia hi’n gen uhi. Airhostess nu’n bottle a piak lai tak in, Ali in numei nu khesiik sak in, Zahir in a muuk tawp ding in kisa a, tuazawh in a a tutphah uah kailut ding in kisa uhi. Passenger te apau ngam om lou in, Jaipur a tun utawh kiton in matkhiak hingal uhi.


LS election:
BJP in list masa suahding
New Delhi, Feb-23: Opposition BJP te’n Lok Sabha election 2014 ding tawh kisai in February 27, 2014 chiangin candidate list masa suahkhe ding uh chih thu om hi. BJP’ central election committee te’n New Delhi ah kuakua kiangah party ticket piakding hiam chih tu in ngaihsun lel uh chih hi a, Feb 27, 2014 (Ningani) in mipi theihdingin official in puankhiak hiding chih thu om hi. BJP leader Arun Jaitley in agendanin, BJP senior leader LK Advani, Rajnath Singh, Narendra Modi, Arun Jaitley, Sushma Swaraj, Murli Manohar Joshi leh heutu tuamtuam te’n Feb 27, 2014 in meeting neinawn ding ua, tua hunah candidate list masa ding puankhiakna neiding uh chi hi.


Khasi Hills ADC in Govt ah Rs 1 crore ngen uh
Shillong, Feb-23: Khasi Hills Autonomous District Council (KHADC) te’n Meghalaya government ah ‘one-time assistance’ di’n Rs 10 crore ngen ua, KHADC nuai a semtute’ arrear ding a kidaihlouh ziak a Rs 10 crore poimawh uh ahihdan zasak uhi. Chief Executive Member Pyngshngain N Syiem in Chief Minister Dr Mukul Sangma kiangah one-time assistance a Rs 10 crore a council kithuahpih dingin ngen a, State Government in leng employee te arrear a piaksawm dan uh ngentel zawdeuh a hilhchian masa ding in ngen uh chih ahi. Executive Member in charge Finance, Antonio War in agenna ah, state government in tunung sawtlou a a sumte hon release pah uh kinephuai chi hi. Council in ahihleh tuni tan in anuai ua semtute’ arrear dingin Rs 8.9 crore pekheta ua, tu in additional Rs 4.64 crore poimawh uh chih ziaka state govt kiang a ngetna a piak uh hi’n leng kigen hi.


Northeast in Union Budget phattuampih ding
Guwahati, Feb-23: Parliament ah Feb 21, 2014 a Interim Budget,2014-15 passed ni in Himachal Pradesh, Uttarakhand state leh Northeast bial state tuamtuam adia Additional Central Assistance(ACA) Rs. 1,2000 crores tel a, huai tungtawn in Northeast a state tuamtuam in phattuamna lianpi ngah tuankei mahleh bangtanhiam phattuampih ding hi’n kigen hi. Union Finance Minister P. Chidambaram in Interim Budget a luikhiak ah Plan expenditure Rs. 5,55,532 crore leh Non-Plan expenditure 12,07,892 crore bikhiah in om hi.
Union Minister of State for Finance Namo Narain Meena in a gendan in scheme teng adia kidaihthei ding in fund kiching bikhiah chiat hi a, UPA govt hun(term) a bei chiang in India gam pumpi economic dinmun kipsa a om ding hi’n gen hi. Huai interim budget ah agricultural credit, educational loan leh India Inclusive Inovation Fund ading in Rs. 800,000 lakh bikhiah a om hi’n leng Union Minister of State for Finance Meena in gen hi.


Dawi betu mi 2 soisak in om
Guwahati, Feb-23: Upper Assam a Sonitpur district ah zan nitak in kangaroo court in innkuan khat dawi bia chi’n siamlouhtan a huai tawh kiton in khawsung mipite’n suang in kideen huan ua, huchih lai in Police te va tungkha zenzen in mi 2 te va hunkhia ua, mi khat dinmun lauthawng huai mahmah chi uhi. Thusuakin agendanin, a tapa khat un damlouhna khawktak atuah ziakin a damsuah ding gelna ziakin a innkuanpih mi 2 te’n dawi bia in kithoihna nei ua, huai in khawsung mipi thangpaisak mahmah hi’n kigen hi. Sonitpur superintendent of police in agenna ah, damlouhna tuak Sandeev leng a natna apan damzoulou in om a, huai phetin khawsung mipite thang pai mahmah in kangaroo court tun uh a, huai ah Judge in mi 2 te’n dawi a biak ziak ua Sandeev in sihlawh ahi chi in mi 2 te dai nawl ah suangin kiden huan uh chi uhi. Tuma zekin leng Assam state sungah hibang thil ana tung a, state government in ngaikhawk mahmahta chih ahi.


Non-Congress, non-BJP front bawlkhiak sawm
New Delhi, Feb-23: Tunung sawtlou a Lok Sabha election om ding ah party tuamtuam 11 kigawm in Non-Congress, non-BJP chih minvuah in Congress leh BJP hilou party dangteng pangkhawm in Lok Sabha election ah pankhawm dingdan genkhawm sawm uh a, Feb 25, 2014 in New Delhi ah meeting ding uhi. Huai ah non-Congress, non-BJP pawl teng pankhawm dingdan a genkhawm ding ban uah a kigawmna min ding tanpha uh a puankhiak uh gintak-huai chihthu om hi. Non-Congress, non-BJP pawlin maban a Lok Sabha election ah member a neihtam theih ua leh ‘Third Front’ chih min hong ginkhiak nawn lam-et huai hi’n leng thusuak in gen hi.
Parliament ah tulelin Congress hiam BJP leng hilou party tuamtuam 11 om uh a, huaite’n Lok Sabha ah tulelin akigawm in MP 90 nei uhi.Party tuamtuam 11te CPI(M), CPI, Samajwadi Party, AIADMK, JD(U), JD(S),BJD, RSP,Forward Bloc, Jharkhand Vikas Morcha leh Asom Gana Parishad hi uhi. Party tuamtuam pangkhawm dinga panlate laka makai deuh CPI(M) General Secretary Prakash Karat in a gendan in People’s Party of Punjab leh Republican Party(Ambedkar) pawl leng tutan in non-Congress, non-BJP pawlah tel naikei mahle uh amau leng tel dinga lam-etna lianzaw om ahihdan gen hi.


LK Advani in RS seat lunggulhlou:
BJP makaite lakah ngaihdan kibanglou
Mumbai, Feb-23:BJP makai khenkhat in BJP veteran LK Advani kiangah Rajya Sabha member hiding in genpih uh a, hileleng LK Advani in Rajya Sabha member hihding tupna nei khalou ahihdan genkhum a,huchi kalah BJP leader pawlkhat mah in LK Advani in Gandhinagar Lok Sabha Constituency akipan MP candidate dingin panla uhi. LK Advani tungtang ah BJP leader-te kala ngaihdan kibanglou om ziakin nawngkaina lianpi om thei ding hi’n thusuak in gen hi.
BJP leader-te laka group khat in Rajya Sabha member hihsak teitei theihna ding in LK Advani thuzawh sawm in genpih mahle uh aman Rajya Sabha member dingin ngaihtuahna neilou himhim hi’n ana genkhum a,huaisang in Lok Sabha election ah candidate dingin amah mimal in thupukna bawlkhin hi’n gen hi.LK Advani in a gendan in Rajya Sabha member ut hileh kum tamkuam paisa akipan in hikhinta ding ahihthu gen hi.Advani ahihleh Gujrat state a Gandhinagar bial apan MP a telching hi a, khenkhat in Madhya Pradesh state akipan MP candidate sawm hi’n agen pawl om mahleh LK Advani in Gandhinagar Parliamentary Constituency akipan mah in Lok Sabha election om ding ah candidate utlai hi’n kigen hi.


A pasal-te suamtu numei khat matkhiak in om
Jaipur, Feb-23: Rajasthan a om kum 25 a upa numei khat in pasal tuamtuam kiban tenpih a, tua zawh chiang in a gold uleh thil manpha tuamtuam guksak in kihemmang zel a, pasal 6 bang a kitenpih leh a suam nungin a vang beita in tuni in matkhiak in om hi. Numei nu kithuahpih pasal 2 leng police ten man uhi. Thusuak kingahdanin, Sriganganagar district a Banda mun a teng Sangeeta Devi leh amah kithuahpih Parmesh leh Krishna Kumar te Jaipur apan km 200 agamla Dholpur mun ah mat in om uhi. Pasal 2 te ahihleh Uttar Pradesh a Kanpur mi tuak hi uhi. Durgaprasad kichi in complaint khe masa penpen a, Sangeeta Devi leh ka tapa kiteng ua, hun bangtanhiam nungin gold leh ka gou manpha tuamtuam uh hon gukmangsak in kihemmang chi’n police ah FIR ana khia a, tualou in a pasal lui teng in leng police ah FIR ana bawlkha uhi.


Headmaster kaplum uh
Belpahari, Feb-23: West Midnapore khua a Primary school ah tuni in Maoist helpawlte va lut in, student te mai ah Headmaster va kaplum uh hi’n thusuak kingah hi. Thusuak in ataklatna ah, zinglam dak 11 vel ding in Maoist helpawl galvan hoihtak tak tawi school compound ah mi 7 va lut uh a, Headmaster office sung ah lut suak in, sam khia uhi. Helpawlte’n daak khen in student teng leng assembly neih sak in om a, student te mai ah Headmaster Karamchand Singh (45) thau in kap ua, tuazawh in a lu suang in khet maatsak uh hi’n kigen hi. Kum 6 paisa in Amjore Primary School in teacher semlai Anil Mahato thah daan tawh ki bang geih hi’n gen ua, mi tamtak lungsim su thak mahmah uhi. Tualthahna mun ahihleh, Kolkata apan Km 250 vel a gamla, West Midnapore a Machkandna village hidan in kigen hi. Class III student Bablu in agenna ah, ka headmaster uh mi nih in student te muh in a nunglam ah aman ua, pasal khat in thau in akap a, amah leng kipai ngal in, suang lian huntawk tak in a lu a khet sak uh chi hi.


Maoists leh Osmania Univ muangmawh
Hyderabad, Feb-23: Andhra Pradesh khawpi Hyderabad a om Osmania University ah Maoists te omsek uh, University leh Maoists te’n kizopna thuktak nei uh chih ngohna om tungtang University Vice Chancellor in tuni in hilhchetna bawl hi. Thusuak kingahdanin, University Vice Chancellor T Tirupati Rao in tuni a agenna ah, University campus sung ah Maoists makai leh heutu khenkhat om uh chih thuleng om pen poi mahmah a, amau hiai University zahtakhuai tak mai pansan in neilou ua, thamlou in thuzuau pumlum ahi chi hi. Vice Chanceloor in thuthaksaite kiang a agenna ah, Vice Chancellor tel in university official kuaman Maoists te om lam ka theikei ua, om ding in leng ka ngaihsun kei himhim uh chi hi. Campus sung ah hostel bangzahhiam om a, huai a om te student ngen hi ua, a pawlam apan in leng minautang lut ngeilou in student leh staff te chauh in campus luah uh chi hi.


FOREIGN NEWS:
Israel PM in Syria rebels-te’ veh

Jerusalem, Feb-23: Israeli Prime Minister, Benjamin Netanyahu in Syria rebels tamtak Israel etkolna gamkaih sunga etkol a omte va veh a, amaute Golan Heights bialsung a hospital khat a etkol hi uhi. Thusuakin agendanin Syrian opposition leader Muhammad Badie in Netanyahu thilhih kipahpih kawm in kapliam a om Syria helpawlte a veh pen “message poimawhtak” hi’n gen a, Syrian government leh opposition pawlin Geneva, Switzerland a kihouna aneih uh alawhsap nunga opposition pawl adia thil kipah huai mahmah chi hi. Syrian government in ngawhna abawldan in rebels pawlte kiangah US leh akizoppihte Saudi Arabia, Qatar & Turkey vuak hilou in Israel tanpha in panpih chi a, Syrian army tawh kidou rebels tamtakte galvan zat leng Israel khutsuak ahihman in Israel in rebels pawl gupna pia hi’n leng kigen hi.


Bangkok mipite bomb in puahkhum
Bangkok,Feb-23: Anti-government protest camp kianga bomb hattak puakzak ah naupang telin mi 2 si uh a, midang 28 vel liam hi’n kigen hi. Thai Prime Minister Yingluck Shinawatra in amah deihloute khauhtak a nawk ding chih thupuan aneih nunga bombpuak hi a, tuni a bombpuak ziakin lampi lai ah sisan tamtak muh ding om hi’n gen uh a, Central World shopping mall a thiltun hunin mipi thawm husa ngaihtak himahleh thakhat thu in dai pah uh hi’n thusuakin gen hi.


Presidential power piak in om

Kiev, Feb-23: Ukraine Parliament in President dinmun leh thuneihna (power) luah dingin assembly speaker lenlel Mr. Oleksander Turchinov mawhpuakna pia a, huai hunah President dinmun aluah tawh kiton in gamsung kituahna hatsak sem ding ahihdan Oleksander Turchinov in gen hi.


SPORTS NEWS:
Premier League :
Chelsea, Arsenal, Manchester City leh Manchester United te vualzou
Barclays English Premier League Feb. 22, 2014 nitak a match 7 kimawlna om ah club lian teng in vualzawhna tang uhi. Makai Chelsea ten Everton te zintun ua, huai ah 0-0 a kidraw ding a gintaklai in hun beikuan injurytime in Captain John Terry in goal poimawh mahmah khum in 1-0 in vualzawhna tang uhi. Tua tawh kiton in Chelsea ten khatna lentang zoulai uhi. Huai banah hiai tegel tu season in a homeground tuak ua kizou uhi. Everton ten amau homeground ah 1-0 mah in zoukhia uhi. Draw tan inleng Chelsea te dinmun kise ban ding lai Terry in injurytime in goal khat khum a, tua ziakin khatna nuamtak in lentou lai uhi. Amau nuai zek a om Arsenal ten Sunderland te zintun ua, huai ah nuamtak in 4-1 in zoukhia uhi. Hiai match ah Arsenal apan half ma in Oliver Giroud in goal nih akizom in khum a, tua zawh half kuan mahmah in Tomas Rosicky in goal khat khum in half tan in 3-0 in makai uhi. Half zawh minute 57 in defender Koscielny in khat khum a, hun beikuan minute 81 in Sunderland apan Giaccherini in consolation goal khat khum a, Arsenal ten 4-1 in vualzawhna tang uhi.
Match dang ah Manchester City ten Stoke City te zintun ua, huai ah goal khum thei hetlou ua, half zawh in Yaya Toure in goal khat khum in huai in 1-0 in vualzawhna tang uhi. Tua ziakin Manchester City ten champion na chance neilai uhi. Amau game in hand khat nei in Chelsea te point 3 in phalou ua, goal a khum tam zawk ziakun Manchester City ten game in hand a neihpen ua vualzawhna a tang ua leh khatna luahtou ding uhi. Defending champion Manchester United in Crystal Palace te va kimawlpih ua, huai ah half tan in goal kikhum omlou ua, half zawh minute 62 in United in penalty mu in Van Persie in peklut hi. Tua zawh minute 68 in striker Wayne Rooney in goal khat khum nawn in 2-0 in vualzawhna tang uhi. Match dang ah Cardiff City ten Hull City te 4-0 in zoulou ua, West Brom leh Fulham te 1-1 in kidraw ua, West Ham ten inform Southampton te 3-1 tak in zoukhia uhi. Tua ziakin relegation zone a omte a vualzou kuamah omlou uh chihna suak hi.

Premier League standings
Play Points
1. Chelsea 27 60
2. Arsenal 27 59
3. Man. City 26 57
4. Liverpool 26 53
5. Tottenham 26 50
6. Man. United 27 45
7. Everton 27 45
8. Southampton 27 39
9. Newcastle 26 37
10. West Ham 27 31
11. Hull City 27 30
12. Swansea 26 28
13. Aston Villa 26 28
14. Stoke City 27 27
15. C. Palace 26 26
16. West Brom 27 25
17. Norwich 26 25
18. Sunderland 26 24
19. Cardiff 27 22
20. Fulham 27 21


I-League :
Salgaocar vualzou; Bengaluru in draw
Indian National Football League match kimawlna Feb. 22 nitak a om ah Kolkata club Mohammedan ten Goa club Salgaocar te zintun ua, huai ah Salgaocar ten 1-0 in vualzawhna tang uhi. Hiai match ah half minute 23 in Salgaocarapan Omagbemi in goal poimawh mahmah khum in huai in vualzawhna tang uhi. Tua tawh kiton in I-League winter break nung a IFA Shield Champion Mohammedan ten match 2 akimawl khakna uah vualzawhna tangkha nailou ua, tua ziakin relegation zone lam manawh uhi.
Feb. 23, 2014 ni a match kimawlna om ah Prayag United ten Shillong Lajong te zintun ua, huai ah vualzawhna tang omlou in 2-2 in kidraw uhi. Hiai match ah half ma in goal 3 kikhum uhi. Minute 13 in Prayag United apan E. Brown in goal khat khum a, tua zawh minute 21 in W. Edekunte in khat khum nawn in 2-0 in makai uhi. Half kuan minute 32 in Shillong Lajong apan D. Boro in goal khat khum in half tan in Prayag United in 2-1 in makai uhi. Half zawh minute 57 in Shillong Lajong apan Uilliams in goal poimawh mahmah khum in 2-2 in kidraw ua, tua nung goal kikhum zou om nawnlou uhi. Draw ziakin Shillong Lajong te ading in kipahhuai mahmah suak hi. Amau match 16 ah point 24 mu in 5na ah om lel uhi. Makai Bengaluru FC ten Mumbai FC te zintun ua, huai ah half tan in goal kikhum omlou ua, half zawh minute 47 in Mumbai FC apan E. Sukore in goal khat khum in 1-0 in makai uhi. Tua zawh minute 10 leng pai nailou in Bengaluru apan Robin Singh in goal khat khum in 1-1 in kidraw uhi. Huaiziakin, Bengaluru in khatna lentang zoulai a, Mumbai FC te ahihleh 10na ah om ua, point 18 nei uhi.


Euro-2016 qualifying group draws
France in a zintun ding Euro-2016 qualifying group drawna zan nitak in om a, huai ah Netherlands leh England te group haksa mahmah maithei in om hi. Group-A a om Netherlands te group haksa ding a gintak in om hi. Great Britain club Scotland te Germany te tawh kigroup kha ua, Wales te ahihleh Bosnia-Herzegovinia leh Belgiumte tawh omkhawm kha ua, Northern Ireland te bel Greece, Hungary, Romania chihte tawh omkhawm kha uhi. England te ahihleh Switzerland, Slovenia leh Estonia chihte tawh omkhawm kha uhi. Defending champion Spain te Group-C ah Ukraine, Slovakia chihte tawh omkhawm ua, Group-I ah Portugal leh Denmark te omkhawm kha nawn uhi. Italy ten Group-H ah Croatia, Norway, Bulgaria chihte a maituah kha ding uhi.

Euro 2016 qualifying groups:
Group A: Netherlands, Czech Republic, Turkey, Latvia, Iceland, Kazakhstan.
Group B: Bosnia-Hercegovina, Belgium, Israel, Wales, Cyprus, Andorra.
Group C: Spain, Ukraine, Slovakia, Belarus, FYR Macedonia, Luxembourg.
Group D: Germany, Republic of Ireland, Poland, Scotland, Georgia, Gibraltar.
Group E: England, Switzerland, Slovenia, Estonia, Lithuania, San Marino.
Group F: Greece, Hungary, Romania, Finland, Northern Ireland, Faroe Islands.
Group G: Russia, Sweden, Austria, Montenegro, Moldova, Liechtenstein.
Group H: Italy, Croatia, Norway, Bulgaria, Azerbaijan, Malta.
Group I: Portugal, Denmark, Serbia, Armenia, Albania.

 

 

Please login to leave a comments